ای میل پڑھنے کی جھنجھٹ ختم، اب سوال پوچھیں اور فوراً جواب پائیں
یہ سہولت صارف کے سوالات کے جواب دینے اور دورانِ گفتگو موضوع بدلنے کی صلاحیت بھی رکھتی ہے۔
-
ویب ڈیسک -
دنیا کی بڑی ٹیکنالوجی کمپنی نے اپنی ای میل سروس کی سہولت میں ایک نیا مصنوعی ذہانت پر مبنی فیچر متعارف کرانے کا اعلان کیا ہے جس کے ذریعے صارفین اب اپنی میل سے بات کرکے معلومات حاصل کرسکیں گے۔
اس نئے فیچر کے تحت صارفین کو مخصوص الفاظ لکھ کر تلاش کرنے کے بجائے عام گفتگو کے انداز میں سوال پوچھنے کی سہولت دی جائے گی۔
یہ نظام میل میں موجود معلومات تلاش کرکے فوری جواب دے گا جیسے سفر کی تفصیلات، ڈاکٹر کے وقت، رہائش کے کوڈ یا بچوں کے اسکول سے متعلق معلومات۔
کمپنی کے مطابق یہ سہولت صارف کی بات کو سمجھنے، مزید سوالات کے جواب دینے اور دورانِ گفتگو موضوع بدلنے کی صلاحیت بھی رکھتی ہے۔
نمائشی پیشکش میں اس نظام نے بچوں کے اسکول پروگرام، تعلیمی دورے اور سفر سے متعلق تفصیلات فوری فراہم کیں۔ یہ فیچر ملتے جلتے الفاظ میں فرق بھی سمجھ سکتا ہے۔
کمپنی نے واضح کیا ہے کہ روایتی تلاش کا نظام ختم نہیں کیا جارہا بلکہ یہ نئی سہولت اضافی آپشن کے طور پر دی جائے گی تاکہ صارف اپنی پسند کے مطابق طریقہ استعمال کرسکے۔
اسی کے ساتھ مصنوعی ذہانت سے چلنے والی دیگر نئی سہولیات بھی متعارف کرائی جا رہی ہیں جن میں خودکار مسودہ تیار کرنا، ضروری فائلیں فوری دکھانا اور کاموں کی فہرست منظم کرنا شامل ہے۔
یہ آواز پر مبنی سہولت نوٹس بنانے والی دوسری ایپلی کیشنز میں بھی دی جائے گی، جہاں صارف بول کر اپنے خیالات درج کراسکے گا اور نظام انہیں خودکار طور پر ترتیب دے گا۔
کمپنی کا کہنا ہے کہ یہ نئی سہولت ابتدائی طور پر مخصوص صارفین کو دستیاب ہوگی جب کہ عام صارفین کے لیے اسے رواں موسمِ گرما میں مرحلہ وار متعارف کرایا جائے گا۔
