ہیڈ تریموں: پانی کی سطح میں اضافہ‘ نشیبی علاقے زیر آب

ہیڈ تریموں پر پانی کی سطح مزید بلند ہونے سے نشیبی علاقے زیر آب آ گئے ہیں۔
مون سون کی بارشوں سے ہیڈ خانکی اور ہیڈ قادر آباد میں پانی کی سطح ایک بار پھر بلند ہو گئی ہے۔
اس وقت ہیڈ خانکی پر پانی کا اخراج ایک لاکھ 49 ہزار ایک سو کیوسک اور ہیڈ قادر آباد پر پانی کا اخراج ایک لاکھ 51 ہزار کیوسک ہے۔
انتظامیہ کے مطابق دونوں مقامات پر اس وقت درمیانے درجے کا سیلاب ہے۔
ہیڈ قادر آباد سے سیلابی پانی کی مسلسل آمد کی وجہ سے ہیڈ تریموں پر پانی کی آمد میں بھی مسلسل اضافہ ہو رہا ہے۔
اس وقت ہیڈ تریموں پر پانی کی آمد ایک لاکھ 18 ہزار 390 کیوسک اور اخراج ایک لاکھ دو ہزار 340 کیوسک ہے۔
پانی کی مسلسل آمد کی وجہ سے دریا کنارے آباد کچھ نشیبی علاقوں میں سیلابی پانی کے داخل ہونے سے سینکڑوں ایکڑ اراضی زیر آب آ چکی ہے۔
نشیبی علاقوں میں سیلابی پانی آنے سے کھڑی فصلیں تباہ ہو گئیں اور لوگوں نے نقل مکانی کا سلسلہ شروع کر دیا ہے