معرکۂ حق کا پہلا سال مکمل ہونے پر پاک افواج کا اہم پیغام، قومی دفاع اور عزم کا اعادہ

معرکۂ حق کا پہلا سال مکمل ہونے پر پاک افواج کا اہم پیغام، قومی دفاع اور عزم کا اعادہ

معرکۂ حق کے دوران کیے گئے آپریشنز فضائی جنگ کی تاریخ میں منفرد اور اعلیٰ پیشہ ورانہ مہارت کا مظہر تھے۔

معرکۂ حق کی پہلی سالگرہ کے موقع پر پاک افواج، خصوصاً پاک فضائیہ نے اس تاریخی اور فیصلہ کن کامیابی کو قومی دفاع کی ایک اہم پیش رفت قرار دیتے ہوئے خراجِ تحسین پیش کیا ہے۔

پاک افواج کے مطابق معرکۂ حق نے قومی اعتماد کو مضبوط کیا، ادارہ جاتی عزم کو نئی قوت دی اور پاک فضائیہ کی جدید جنگی تیاریوں کو دنیا کے سامنے واضح کیا۔ پاک فضائیہ جدید ٹیکنالوجی، اسمارٹ سسٹمز اور جدید صلاحیتوں کے ذریعے مستقبل کی فضائی قوت کے طور پر ابھر رہی ہے۔

پاک فضائیہ نے کہا کہ ملٹی ڈومین آپریشنز میں مہارت نے اسے جدید فضائی جنگ کے تقاضوں کے مطابق ایک مؤثر اور فیصلہ کن فورس بنا دیا ہے۔ معرکۂ حق کے دوران کیے گئے آپریشنز فضائی جنگ کی تاریخ میں منفرد اور اعلیٰ پیشہ ورانہ مہارت کا مظہر تھے، جنہوں نے قومی اعتماد اور حوصلے کو مزید بڑھایا۔
پاک افواج نے کہا کہ پاکستان ایک امن پسند ملک ہے اور اس کی فوجیں ہمیشہ امن، استحکام اور سلامتی کے فروغ کے لیے کام کرتی ہیں۔ امن پاکستان کے لیے ہمیشہ عزت، وقار اور خودمختاری سے جڑا رہا ہے۔

بیان میں کہا گیا کہ مسلح افواج خطے کی بدلتی صورتحال اور دشمن کی تیاریوں سے مکمل آگاہ ہیں اور جدید ٹیکنالوجی و پیشہ ورانہ مہارت میں مسلسل سرمایہ کاری کر رہی ہیں۔ افواج نے واضح کیا کہ پاکستان کے خلاف کسی بھی جارحیت کا جواب پہلے سے زیادہ طاقت اور عزم کے ساتھ دیا جائے گا۔
معرکۂ حق میں دشمن کو پاکستان کی دفاعی صلاحیت کا عملی مشاہدہ ہوا اور آئندہ کسی بھی مہم جوئی کا جواب اس سے بھی زیادہ سخت ہوگا، اِن شاء اللہ۔

آج پوری قوم پاک فضائیہ کے جوانوں اور افسران کو ان کی جرات، قربانی اور شاندار کارکردگی پر خراجِ تحسین پیش کرتی ہے۔ پاک فضائیہ نے دشمن کے عزائم ناکام بنا کر ملک کی فضائی حدود کا کامیاب دفاع کیا۔

بیان کے اختتام پر کہا گیا کہ پاک فضائیہ اپنی پیشہ ورانہ برتری اور عزم کے باعث ہمیشہ سیکنڈ ٹو نون رہے گی اور قوم کے لیے فخر اور طاقت کی علامت بنی رہے گی۔

پاکستان ہمیشہ زندہ باد۔