فیلڈ مارشل عاصم منیر کا ژوب کا دورہ؛ عید فوجی جوانوں کے ساتھ منائی
دورے کے دوران فیلڈ مارشل نے مغربی سرحدوں پر تعینات فوجی افسروں اور جوانوں سے ملاقات کی
-
سلمان علی اعوان -
راولپنڈی: فیلڈ مارشل سید عاصم منیر نے عیدالاضحیٰ کے موقع پر ژوب کا دورہ کیا اور وہاں تعینات فوجی دستوں کے ساتھ عید کی نماز ادا کی اور دن گزارا۔
پاک فوج کے شعبہ تعلقات عامہ (آئی ایس پی آر) کے مطابق دورے کے دوران فیلڈ مارشل نے مغربی سرحدوں پر تعینات فوجی افسروں اور جوانوں سے ملاقات کی اور انہیں عیدالاضحیٰ کی مبارکباد پیش کی۔
آئی ایس پی آر کے مطابق نمازِ عید کے بعد ملک کی ترقی، خوشحالی، امن و استحکام اور شہداء کے بلند درجات کے لیے خصوصی دعائیں بھی کی گئیں۔
فیلڈ مارشل عاصم منیر نے غیر ملکی سپانسرڈ دہشت گردی کے خلاف فوجی دستوں کی غیر معمولی ہمت، غیر متزلزل عزم، آپریشنل تیاری اور مسلسل چوکسی کو سراہا۔
اس موقع پر سی ڈی ایف نے بھی دہشت گردی اور خطرات کے خلاف قوم کی حفاظت کے لیے جوانوں کی بے مثال شجاعت اور قربانیوں کو زبردست خراجِ تحسین پیش کیا۔
